歌手：林海峰 |  作曲：陳奐仁@theinvisibleman
填詞：林海峰 |  編曲：陳奐仁@theinvisibleman

某一年一班剛剛考完會考嘅同學約埋一齊唱K
流行曲唱到一半嘅時候
其中一位朋友問咗隔離嗰位一個問題
喂　你估吓二十年後嘅今日我地會變成一個咩人呢

二十年後
可能已經變成一個西裝骨骨嘅中環人
手帶勞力士　銀包有好多張信用卡
放工嘅時候就一齊响酒吧度
一邊望住個煙灰盅
一邊就望住隔離檯嗰個女仔
睇吓佢條裙幾時會走光

二十年後
大概終於會買咗個部好想擁有既汽車
但係仲有二十幾期要供
二十年嘞　應該轉過好多份工
識做嘅野越嚟越多
但係同時發覺學識越嚟越少

响嗰個時間　間唔中可能會去吓gym
但係做嚟做去都係減唔到個肚腩
當然二十年嚟你間唔中都會諗起一段
一路都未能放低嘅感情
女朋友越嚟越多　但係愛嘅越嚟越少

細路哥　你得到什麼　你失去什麼
你知道　what are u looking for

大概响嗰個時候可能會有身邊嘅親人離開
而响個陣時你會有好多講唔出口嘅遺憾
同時間你會發覺原來人生已經過咗一大半

同年終於結婚嘞
用左半生嘅積蓄俾左一層樓嘅首期
有車位有泳池會所
娛樂越嚟越多但係快樂越嚟越少

兩年後　可能會離婚
回復單身之後嘅一個晚上一個人响床上面
揸住個搖控不停咁轉台　食咗兩粒安眠藥
跟住點起支薄荷煙
然後流咗一滴自親人離世之後嘅眼淚

突然之間你又諗起　响二十年前
你係一個咩人　係個一晚
一大班同學約埋出嚟唱K唱到天光
仲記得係個朝返到屋企嘅時候
打開門响檯面見到有一碗屋企人留低嘅湯
碗湯已經凍咗嘞

細路哥　你得到什麼　你失去什麼
你知道　what are u looking for